ମହାନଦୀ ଡଙ୍ଗାବୁଡ଼ି ଘଟଣା: ମୃତ୍ୟୁ ସଂଖ୍ୟା ୧୦ରେ ପହଞ୍ଚିଲା


ଆଓରି-ଭୁବନେଶ୍ଵର(୦୪/୦୧) : ହୁକିଟୋଲା ଡଙ୍ଗାବୁଡି ଘଟଣାରେ ମୃତ୍ୟୁ ସଂଖ୍ୟା ୧୦କୁ ବୃଦ୍ଧି ହୋଇଛି । ୪୦ ଘଣ୍ଟା ପରେ ନିଖୋଜ ଶିଶୁର ମୃତଦେହ ଉଦ୍ଧାର କରାଯାଇଛି । ଘଟଣାସ୍ଥଳ ନିକଟସ୍ଥ ନିପାଣିଆରୁ ୬ ବର୍ଷ ଶିଶୁର ମୃତଦେହ ମିଳିଛି । ହୁକିଟୋଲା ଡଙ୍ଗାବୁଡିର ୯ ଜଣଙ୍କ ମୃତ୍ୟୁ ହୋଇଥିବା ବେଳେ ଜଣେ ଶିଶୁ ନିଖୋଜ ଥିଲା । ଅଗ୍ନିଶମ ବାହିନୀ ଓ ଏନଡିଆରଏଫ ପକ୍ଷରୁ ଉଦ୍ଧାର କାର‌୍ୟ୍ୟ ଜାରି ରହିଥିବା ବେଳେ ଆଜି ମୃତଦେହ ମିଳିଥିବା ସୂଚନା ମିଳିଛି ।Boat-Sink-Aajira-Odisha

ସୂଚନାଯୋଗ୍ୟ, ବୁଧବାର ରାତିରେ ମହାକାଳପଡା ମହାନଦୀରେ ଯାତ୍ରୀବାହୀ ଡଙ୍ଗା ବୁଡିଯାଇଥିଲା । ଡଙ୍ଗା ବୁଡି ୯ଜଣଙ୍କର ମୃତ୍ୟୁ ହୋଇଥିଲା । ତେବେ ସେହି ଦିନ ୯ ଜଣଙ୍କ ମୃତଦେହ ଉଦ୍ଧାର କରାଯାଇଥିଲା । ମିଳିଥିବା ସୂଚନା ଅନୁସାରେ, ଗତକାଲି ସନ୍ଧ୍ୟା ୭ଟାରେ ମହାକାଳପଡ଼ାର ହୁକିଟୋଲା ଦ୍ୱୀପରୁ ବଣଭୋଜି ସାରି ୧୯ ଟି ପରିବାରର ପ୍ରାୟ ୫୦ ଜଣ ଯାତ୍ରୀ ଗୋଟିଏ ଡଙ୍ଗାରେ ଫେରୁଥିଲେ । ବତୀଘର ନିକଟ ସାନନିପାଣିଆ ଭାନୁଗିରିଘାଟରେ ଜଣେ ମହିଳା ଶୌଚ ପାଇଁ କହିବାରୁ ସେହି ସ୍ଥାନରେ ଡଙ୍ଗାଚାଳକ କୂଳକୁ ଡଙ୍ଗା ନେଉଥିଲେ । ଅଚାନକ ଏକ ମାଛ ଧରା ବୋଟ୍‌ ଦ୍ରୁତ ଗତିରେ ଡଙ୍ଗା ଆଡ଼କୁ ଆସିଯିବାରୁ ଭୟରେ ଡଙ୍ଗାରେ ଥିବା ଯାତ୍ରୀମାନେ ଗୋଟିଏ ପଟକୁ ଆଉଜି ଯାଇଥିଲେ । ଫଳରେ ଡଙ୍ଗାଟି ସେଠାରେ ଭାରସାମ୍ୟ ହରାଇ ଲେଉଟି ପଡ଼ିଥିଲା । ସନ୍ଧ୍ୟା ସମୟରେ ଜୁଆର ଥିବାରୁ ଯାତ୍ରୀମାନେ ପାଣି ଭିତରକୁ ଟାଣି ହୋଇଯାଇଥିଲେ । ଜୁଆର ସ୍ରୋତରେ କେତେକ ପହଁରି ପହଁରି କୂଳକୁ ଆସିଥିଲେ ।

 ସେମାନଙ୍କ ମଧ୍ୟରୁ ପ୍ରଭାତି ସ୍ୱାଇଁ(୩୬ ବର୍ଷ), ଅନୁପମା ତରାଇ(୩୦ ବର୍ଷ), ନସାଇ ତରାଇ (୪ ବର୍ଷ), ଦେବାଶିଷ ସାହୁ, ଦେବସ୍ମିତା ପାଣି(୬ ବର୍ଷ), ରୋଜି ସାହୁ(୧୪ ବର୍ଷ) , ଧୁନା ସାହୁ(୧୦ ବର୍ଷ), ସୁଶ୍ରୀ ପଲ୍ଲବୀ ସ୍ୱାଇଁ( ୫ ବର୍ଷ)ଙ୍କ ମୃତଦେହ ଉଦ୍ଧାର ହୋଇଥିଲା। ଅନ୍ୟ ଜଣେ ନାବାଳିକା ନିଖୋଜ ହୋଇ ଯାଇଥିଲେ। ଆଜି ସକାଳେ ଓଡ୍ରାଫ୍ଟ ଟିମ୍‌ ଡଙ୍ଗାବୁଡ଼ି ଘଟଣାସ୍ଥଳ ଠାରୁ ପ୍ରାୟ ୨ କିଲୋମିଟର ଦୂରରୁ ନିଖୋଜ ଶୁଭଶ୍ରୀ ସ୍ୱାଇଁ(୬ ବର୍ଷ)ଙ୍କ ମୃତଦେହ ଉଦ୍ଧାର କରିଛନ୍ତି। ଶୁଭଶ୍ରୀ ହେଊଛନ୍ତି ଅକ୍ଷୟ ସ୍ୱାଇଁଙ୍କ ଝିଅ। ଏହି ନାବାଳିକାଙ୍କ ମୃତଦେହ ମିଳିବା ପରେ ଏହି ଡଙ୍ଗାବୁଡ଼ି ଘଟଣାରେ ମୃତ୍ୟୁ ସଂଖ୍ୟା ୧୦ରେ ପହଞ୍ଚିଛି।