ଏଲ୍‌ଏସିରୁ ପଛକୁ ହଟିଲା ଚୀନ ସେନା

ଆଓରି-ନୂଆଦିଲ୍ଲୀ(୦୬/୦୭) : ଲେହରେ ମୋଦିଙ୍କ ଲଲକାର ପରେ ନଇଁଲା ଡ୍ରାଗନ୍  । ପ୍ରଧାନମନ୍ତ୍ରୀଙ୍କ ଗସ୍ତର ମାତ୍ର 3 ଦିନ ମଧ୍ୟରେ ସି ଜିନପିଙ୍ଗଙ୍କ ପିଏଲଏ ଆର୍ମି ଗଲୱାନ୍ ଘାଟିରୁ ପଛକୁ ହଟିଛି । ସାଟେଲାଇଟ ଚିତ୍ରରୁ ଜଣାପଡିଛି ଯେ ଚୀନ ସେନା ଗଲୱାନ ଘାଟି ଠାରୁ ପାଖାପାଖି ଦେଢ କିଲୋମିଟର ପଛକୁ ହଟିଛି  । ଏଥିସହିତ ଏହାର ଅସ୍ଥାୟୀ ଟେଣ୍ଟ, ସାମରିକ ଅସ୍ତ୍ରଶସ୍ତ୍ରକୁ ବି ପଛକୁ ନେଇ ଫେରିଯାଇଛି  । ପ୍ରତିରକ୍ଷା ବିଶେଷଜ୍ଞଙ୍କ ଅନୁସାରେ ବେଜିଂ ଉପରେ ପଡୁଥିବା ଅନ୍ତର୍ଜାତୀୟ ଚାପ ପରେ ଏହାର ସ୍ୱର ନରମିବାରେ ଲାଗିଛି  । ପୂର୍ବରୁ ଗଲୱାନରେ ଦୁଇ ଦେଶର ସେନା ଗତ ଜୁନ 15ରେ ମୁହାଁମୁହିଁ ହୋଇଥିଲେ  । ଏଥିରେ ଭାରତର 20 ଯବାନ ସହିଦ ହୋଇଥିଲେ  । ଚୀନ ପକ୍ଷର ମଧ୍ୟ ଅନେକ ଯବାନ ମୃତାହାତ ହୋଇଥିଲେ  । ପରେ ଉତ୍ତେଜନା କମାଇବା ପାଇଁ ଦୁଇ ଦେଶ ମଧ୍ୟରେ ତିନି ତିନି ଥର କମାଣ୍ଡର ସ୍ତରୀୟ ଆଲୋଚନା କରାଯାଇଥିଲା  ।

ତଥାପି ଚୀନ ଏହାର ଦାଦାଗିରି ଜାରି ରଖିଥିଲା  । ଭାରତର କୂଟନୈତିକ ପଦକ୍ଷେପ ପରେ ପାଖାପାଖି 27ଟି ଦେଶ ଜାତିସଂଘରେ ଚୀନ ବିରୁଦ୍ଧରେ ମୋର୍ଚ୍ଚା ଖୋଲିଥିଲେ  । ସେପଟେ ଜାପାନ-ଅଷ୍ଟ୍ରେଲିଆ ଓ ଆମେରିକା ମଧ୍ୟ ଚୀନକୁ କୌଣସି ବି ହରକତ କଲେ କଡ଼ା ଜବାବ ଦିଆଯିବା ନେଇ ୱାର୍ଣ୍ଣିଂ ଦେଇଥିଲେ  । ଆଉ ଏପଟେ ଭାରତୀୟ ସ୍ଥଳ ସେନା ଓ ବାୟୁ ସେନା ଲଦାଖ ଘାଟିରେ ଏହାର ସାମରିକ ଶକ୍ତି ବଢାଇବା ସହ ଘନ ଘନ ଏୟାର ଅପରେସନ ଜାରି ରଖିଥିଲା  । ଏସବୁ ଦେଖି ଶେଷରେ ଭୟଭୀତ ହୋଇ ଡ୍ରାଗନ୍ ଏହାର ପିଏଲଏ ଆର୍ମିକୁ ପଛକୁ ହଟାଇବା ପାଇଁ ନିଷ୍ପତ୍ତି ନେଇଛି  । ବର୍ତ୍ତମାନ ଗଲୱାନ ଘାଟିକୁ ବଫର ଜୋନ ଭାବରେ ଘୋଷଣା କରାଯାଇଛି  । ଏହାର ଅର୍ଥ ଏହି ଅଞ୍ଚଳରେ ଏବେ କୌଣସି ବି ପକ୍ଷର ସେନା ଗତିବିଧି ହେବ ନାହିଁ  । ଯାହାଦ୍ୱାରା ଜୁନ 15 ଭଳି ଘଟଣାର ସମ୍ଭବନା କମ୍ ରହିବ  । ଉଭୟ ସେନା ଏବେ ଶାନ୍ତି ପ୍ରତିଷ୍ଠା ଦିଗରେ ଏହା ପ୍ରଥମ ପ୍ରୟାସ କରୁଥିବା କୁହାଯାଉଛି  ।

ତେବେ 3 ଥର କମାଣ୍ଡର ସ୍ତରୀୟ ଆଲୋଚନା ପରେ ବି ଚୀନ ମାନିନଥିବା ବେଳେ ଏବେ ପଛକୁ ହଟିବାକୁ ନିଷ୍ପତ୍ତି ନେଇଛି । ଜାମ୍ମୁକାଶ୍ମୀରରୁ 370 ହଟାଇବାଠୁ ସର୍ଜିକାଲ ଷ୍ଟ୍ରାଇକ୍‌ ଓ ଏୟାର ଷ୍ଟ୍ରାଇକ୍‌ ସବୁରେ ମୁଖ୍ୟ ଭୂମିକା ନେଇଥିବା ଜାତୀୟ ସୁରକ୍ଷା ପରାମର୍ଶ ଦାତା (ଏନଏସଏ) ଅଜିତ ଡୋଭାଲ ମଧ୍ୟ ଏଥିରେ ମୁଖ୍ୟ ଭୂମିକା ନେଇଥିବା କୁହାଯାଉଛି । ଚୀନର ବୈଦେଶିକ ମନ୍ତ୍ରୀଙ୍କ ସହ ଆଲୋନା କରିଥିଲେ ଡୋଭାଲ । ଯେଉଁଥିପାଇଁ ଦୁଇ ଦେଶ ମଧ୍ୟରେ ସହମତି ହୋଇଥିବା ଦେଖିବାକୁ ମିଳିଛି । ତେବେ ଚୀନର ବୈଦେଶିକ ମନ୍ତ୍ରୀ ୱାଙ୍ଗ ୟି ମଧ୍ୟ ଚୀନର ସୁରକ୍ଷା ପରାମର୍ଶ ଦାତା ଅଛନ୍ତି । ତେବେ ଦୁଇ ଦେଶ ମଧ୍ୟରେ ଉଚ୍ଚ ସ୍ତରୀୟ ଆଲୋଚନା ପାଇଁ ପ୍ରତିନିଧି ଚୟନ କରାଯାଇଥିଲା । ଯେଉଁଥିରେ ଅଜିତ ଡୋଭାଲ ସ୍ଥାୟୀ ସଦସ୍ୟ ମଧ୍ୟ ଅଛନ୍ତି ।